چیچہ وطنی: رائے علی نواز کرکٹ اسٹیڈیم میں ایک شاندار اور کانٹے دار T20 کرکٹ میچ کے دوران سٹی پریس کلب چیچہ وطنی نے الفریدیہ چشتیہ کرکٹ کلب (چشتیاں) کے خلاف آخری اوور میں تاریخی فتح حاصل کر لی۔
میچ کے آغاز میں الفریدیہ چشتیہ کرکٹ کلب نے ٹاس جیت کر پہلے بیٹنگ کا فیصلہ کیا اور جارحانہ کھیل پیش کرتے ہوئے مقررہ 20 اوورز میں 194 رنز کا بڑا ہدف مقرر کیا۔
جواب میں سٹی پریس کلب چیچہ وطنی نے پراعتماد اننگز کا آغاز کیا۔ اوپنرز عاصم ڈوگر، اسامہ وٹو اور حمزہ نادر نے شاندار بیٹنگ کرتے ہوئے ٹیم کو مضبوط بنیاد فراہم کی جبکہ کپتان شیراز پیا نے ذمہ دارانہ انداز میں کھیل کو آخری لمحات تک پہنچایا۔
فیصلہ کن آخری اوور میں 9 رنز درکار تھے، جہاں جنرل سیکرٹری طاہر جواد ملک نے دباؤ کے باوجود دو شاندار چھکے لگا کر ایک گیند قبل ہی ٹیم کو یادگار فتح دلائی۔
میچ کے اختتام پر مہمانِ خصوصی اسسٹنٹ کمشنر چیچہ وطنی جاوید ممتاز لکھویرا، صدر سٹی پریس کلب چیچہ وطنی رانا شہباز اختر اور دیگر معزز شخصیات نے کھلاڑیوں میں ٹرافیاں تقسیم کیں اور فاتح ٹیم کو مبارکباد پیش کی۔
یہ میچ نہ صرف چیچہ وطنی کے کرکٹ شائقین کے لیے سنسنی خیز رہا بلکہ سٹی پریس کلب چیچہ وطنی کی ٹیم کی بہترین کارکردگی کو بھی اجاگر کرتا ہے۔