کمیر (ساہیوال نیوز) تھانہ کمیر کی حدود میں ساہیوال – عارف والا روڈ پر چک 115/9-ایل کے قریب 15 کے قریب بپھرے ہوئے نوجوانوں نے لاہور سے چشتیاں جانے والی مسافر بس کو روک لیا اور ڈرائیور کو شدید تشدد کا نشانہ بنایا۔
واقعہ کی تفصیل: حملہ آوروں نے سڑک پر رکاوٹیں کھڑی کر کے بس کو روکا اور ڈنڈوں و سوٹوں سے بس کے شیشے توڑ دیے۔ ملزمان نے ڈرائیور محمد افضل اور کنڈکٹر کو بس سے باہر گھسیٹ لیا، انہیں تشدد کا نشانہ بنایا اور ان سے 1 لاکھ 83 ہزار روپے چھین کر فرار ہو گئے۔
پولیس کارروائی: پولیس کے مطابق یہ جھگڑا چند روز قبل کرائے کے تنازع پر بس عملے کی جانب سے طلبہ کی مبینہ تذلیل کے باعث پیش آیا۔ منیجر اظہر حسین کی مدعیت میں مقدمہ درج کر کے دو ملزمان، مبشر جوئیہ اور منور بھٹی کو گرفتار کر لیا گیا ہے۔ باقی طلبہ کی گرفتاری کے لیے پولیس کے چھاپے جاری ہیں.