تحریر: محمد ذوالفقار لون (سینیئر ایڈوائزر، وفاقی محتسب سیکرٹریٹ، ریجنل آفس ساہیوال)
وفاقی محتسب کا ادارہ، جو صدارتی آرڈر نمبر 1 آف 1983 کے تحت قائم کیا گیا، آج وفاقی اداروں میں بدانتظامی کے خلاف غریب اور بے سہارا عوام کے لیے ایک مضبوط ڈھال بن چکا ہے۔
اس ادارے کا بنیادی مقصد ناانصافی کا شکار افراد کی دادرسی اور وفاقی محکوموں میں نظم و ضبط کا قیام ہے۔ اسلام آباد میں مرکزی سیکرٹریٹ سے شروع ہونے والا یہ سفر اب ملک بھر میں 21 علاقائی دفاتر اور 4 شکایات مراکز تک پھیل چکا ہے، جو عوام کو ان کی دہلیز پر انصاف فراہم کر رہے ہیں۔
ساہیوال ریجنل آفس کا قیام اور پس منظر
ریجنل آفس ساہیوال کا قیام اپریل 2025 میں عمل میں آیا۔ اس سے قبل ساہیوال ڈویژن کے شہریوں کو اپنے مسائل کے حل کے لیے لاہور، فیصل آباد یا ملتان کے چکر لگانے پڑتے تھے، جس سے نہ صرف وقت ضائع ہوتا تھا بلکہ مالی مشکلات کا بھی سامنا کرنا پڑتا تھا۔
سابق وفاقی محتسب جناب اعجاز احمد قریشی کی ذاتی دلچسپی اور وژن کی بدولت ساہیوال میں اس دفتر کا قیام ممکن ہوا، جس کا افتتاح انہوں نے خود کیا۔ آج یہ دفتر اپنی پہلی سالگرہ منا رہا ہے۔ موجودہ وفاقی محتسب جناب نوید کامران بلوچ کی زیرِ قیادت یہ دفتر خدمتِ خلق کے جذبے سے سرشار ہو کر کام کر رہا ہے۔
ایک سالہ کارکردگی: اعداد و شمار کی روشنی میں
ساہیوال ریجنل آفس نے محض ایک سال کے قلیل عرصے میں وہ سنگ میل عبور کیے ہیں جو دیگر اداروں کے لیے مثال ہیں۔
موصولہ شکایات: سال بھر میں مجموعی طور پر 6077 شکایات موصول ہوئیں۔
حل شدہ شکایات: ان میں سے 5102 شکایات کا فیصلہ کر دیا گیا۔
عمل درآمد: مرکزی سیکرٹریٹ کی جانب سے دیا گیا 95 فیصد ہدف عبور کرتے ہوئے 99 فیصد فیصلوں پر عمل درآمد کرایا گیا، جس کی بدولت ساہیوال آفس پورے ملک میں دوسرے نمبر پر رہا۔
مالی ریلیف: مختلف وفاقی محکموں سے عوام کو تقریباً ڈھائی کروڑ روپے کا براہِ راست ریلیف دلوایا گیا۔
ٹیم ورک اور جذبہ خدمت
اس کامیابی کے پیچھے ریجنل آفس کے افسران اور عملے کی انتھک محنت شامل ہے۔ ابتدائی طور پر جناب عنایت اللہ دولا نے بطور انچارج خدمات انجام دیں، جن کے بعد ریجنل آفس لاہور کے ایڈوائزر جناب اظہار احمد نے چارج سنبھالا۔
راقم الحروف (محمد ذوالفقار لون) نے 13 مئی 2025 کو بطور ایڈوائزر جوائن کیا اور بعد ازاں سینیئر ایڈوائزر کے عہدے پر ترقی پائی۔ انتظامی امور میں امپلیمنٹیشن ونگ کے انچارج مظہر حسین کاٹھیا اور ایڈمن و اکاؤنٹس ونگ کی انچارج مس فرزین حیدر کی کاوشیں بھی لائق تحسین ہیں۔
شکایت درج کرانے کا آسان طریقہ
وفاقی محتسب کے پاس شکایت درج کرانا انتہائی سادہ ہے، جس کے لیے کسی وکیل کی ضرورت نہیں:
1. سادہ درخواست: ایک سادہ کاغذ پر وفاقی ادارے کے خلاف اپنی شکایت تحریر کریں۔
2. دستاویزی ثبوت: اگر کوئی ثبوت ہو تو ساتھ لف کریں۔
3. رابطہ معلومات: اپنا پتہ، فون نمبر اور شناختی کارڈ نمبر درج کر کے دستخط یا انگوٹھا لگائیں۔
4. ذرائع: آپ اپنی درخواست بذریعہ ڈاک، ای میل، واٹس ایپ یا آن لائن بھی بھیج سکتے ہیں۔
شفاف سماعت اور فوری انصاف
شکایت کی موصولی کے بعد فریقین کو نوٹس جاری کیے جاتے ہیں۔ سماعت کے دوران دونوں فریقوں کو اپنا موقف پیش کرنے کا بھرپور موقع دیا جاتا ہے۔ اگر کوئی سائل حاضر نہ ہو سکے تو فون پر بھی اس کا موقف سنا جاتا ہے۔ سب سے اہم بات یہ ہے کہ شکایت درج ہونے کے 30 سے 45 دن کے اندر فیصلہ کر دیا جاتا ہے اور فیصلے کی کاپی بلا معاوضہ فراہم کی جاتی ہے۔
ریجنل آفس ساہیوال سائلین کے لیے "چشمِ ما روشن، دلِ ما شاد” کی عملی تصویر بن چکا ہے، جہاں ہر سائل کی عزتِ نفس کا خیال رکھتے ہوئے اسے انصاف کی فراہمی یقینی بنائی جاتی ہے۔