ساہیوال: ڈائریکٹر جنرل اینٹی کرپشن پنجاب سہیل ظفر چٹھہ کے "کرپشن سے پاک پنجاب” ویژن کے تحت ریجنل ڈائریکٹر اینٹی کرپشن ساہیوال بشارت نبی کی خصوصی ہدایت پر ایک کامیاب چھاپہ مار کارروائی کی گئی۔ اس کارروائی کے دوران یونین کونسل کے سینئر کلرک کو رشوت لیتے ہوئے موقع پر گرفتار کر لیا گیا۔
تفصیلات کے مطابق انسپکٹر ہیڈ کوارٹر اینٹی کرپشن ساہیوال صہیب قیصر نے اپنی ٹیم کے ہمراہ مجسٹریٹ کی زیرِ نگرانی چیچہ وطنی میں کامیاب ریڈ کیا۔ کارروائی کے دوران یونین کونسل "مراد کے کاٹھیا” (ضلع ساہیوال) کے سینئر کلرک محمود کو 10,000 روپے رشوت لیتے ہوئے رنگے ہاتھوں قابو کر لیا گیا۔
واقعہ کا پس منظر:
ملزم محمود نے مدعی ریاض سے اس کے والد کا ڈیتھ سرٹیفکیٹ جاری کرنے کے عوض 10,000 روپے رشوت طلب کی تھی۔ ریڈ کے دوران نشان زدہ نوٹ ملزم کے قبضے سے برآمد کر لیے گئے۔
> "پنجاب کو کرپشن سے پاک کرنا ہماری اولین ترجیح ہے۔ عوام کے جائز کاموں میں رکاوٹ ڈالنے اور رشوت طلب کرنے والے اہلکار کسی رعایت کے مستحق نہیں۔”
> — ترجمان اینٹی کرپشن ساہیوال
اینٹی کرپشن تھانہ ساہیوال میں ملزم کے خلاف مقدمہ درج کر لیا گیا ہے اور مزید قانونی تحقیقات کا آغاز کر دیا گیا ہے۔