ساہیوال (رپورٹ: سٹی رپورٹر | 17 جنوری 2026)
حکومت پنجاب کے "کرپشن سے پاک پنجاب” ویژن کے تحت محکمہ اینٹی کرپشن ساہیوال نے ایک کامیاب کارروائی کرتے ہوئے رشوت خور عناصر کے خلاف شکنجہ کس دیا۔ ڈائریکٹر جنرل اینٹی کرپشن پنجاب سہیل ظفر چٹھہ اور ریجنل ڈائریکٹر بشارت نبی کی خصوصی ہدایات پر سرکل آفیسر ارشد زمان وٹو نے اپنی ٹیم کے ہمراہ چھاپہ مار کر سیکرٹری یونین کونسل کو گرفتار کر لیا۔
ریڈ کی تفصیلات اور گرفتاری
اینٹی کرپشن ٹیم نے مجسٹریٹ کی زیر نگرانی یونین کونسل نمبر 08 سٹی غلہ منڈی میں کامیاب ریڈ کی۔ اس دوران سیکرٹری محمد شاہد کو مدعی عبدالرزاق سے 10,000 روپے رشوت لیتے ہوئے رنگے ہاتھوں قابو کر لیا گیا۔ ریڈ کے دوران نشان زدہ نوٹ موقع پر ہی ملزم کے قبضے سے برآمد کر لیے گئے۔
رشوت کا مطالبہ کیوں کیا گیا؟
تفصیلات کے مطابق ملزم محمد شاہد نے مدعی عبدالرزاق سے اس کے چچا زاد بھائی کی بیٹی کا برتھ سرٹیفیکیٹ جاری کرنے کے عوض 10,000 روپے بطور رشوت طلب کیے تھے۔ قانونی تقاضے پورے کرنے کے بجائے ملزم نے رقم کی وصولی پر اصرار کیا، جس پر اینٹی کرپشن حکام کو اطلاع دی گئی۔
مقدمہ درج اور قانونی کارروائی
ترجمان اینٹی کرپشن ساہیوال کے مطابق:
ملزم کے خلاف تھانہ اینٹی کرپشن ساہیوال میں مقدمہ نمبر 02/2026 درج کر لیا گیا ہے۔
ایف آئی آر میں 161 تعزیراتِ پاکستان اور 5/2/47 انسدادِ بدعنوانی ایکٹ کی دفعات شامل کی گئی ہیں۔
ملزم کو حراست میں لے کر مزید تفتیش کا آغاز کر دیا گیا ہے۔
"کرپشن میں ملوث کسی بھی سرکاری اہلکار کے ساتھ کوئی رعایت نہیں برتی جائے گی۔ عوام کی خدمت کی راہ میں رکاوٹ بننے والے انجام کو پہنچیں گے.” ترجمان اینٹی کرپشن ساہیوال